[轉貼]夾星座得唔得？
根據英國曼徹斯特大學的科學家做統計之後話唔可以用星座配對夫婦，尤其係天蠍座同雙魚座係最易分手收場！咁唔通星座配對係…唔得？
睇完呢個統計研究，凡係對占星有一定認識的人都會覺得好頭痕，因為佢呢個研究對於占星講的登對實在係太表面，一般提到的所謂「最登對星座」其實都只係講到邊d太陽位置的星座同邊d太陽位置的星座較為容易互相吸引同價值觀接近，但係一旦去到要講兩個人朝見口晚見面共同長時間生活的話，單單係參考太陽位置的星座(即係3月20號至4月20號呢個範圍出世的人係白羊座…)而唔睇其他參考資料就落判斷，就好似見人打乞嚏就斷定當事人傷風一樣武斷，打乞嚏的可能性有好多，感冒？傷風？敏感？甚至乎佢只係想人注意佢，講到登對情侶亦一樣，要更多的資料至得！
另外仲有係「最登對情侶」唔代表佢兩個人會知成夫婦，要睇一個人的戀愛生活，要參考的項目好多，要響度詳細解釋亦都好難，唔係三言兩語可以講得明，不過唔知大家有冇留意，好多時候你又或者朋友口講鍾意的對象類型、談戀愛的對象同最後結婚的對象，有機會係完全唔同類型，點解會咁呢？首先一個人鍾意的型係取決於金星同火星的位置(男仔睇金星，女仔睇火星)；而談戀愛的狀況就要睇第5宮；去到談婚論嫁的階段就取決於第7宮、太陽同月亮的位置(男仔睇月亮，女仔睇太陽)！
講到要睇兩個人婚後的生活夾唔夾，其實參考兩個人的月亮位置更加重要，就好似個報導舉雙魚座的布斯韋利斯同天蠍座的狄美摩亞，佢兩個的月亮星座分別係水瓶座同金牛座，呢個組合根本好難溝通，分手只係時間問題，所以單係睇太陽位置屬於天蠍座同雙魚座夫婦係冇用，仲要調查埋雙方的月亮位置至得！
至於講到咩星座同咩星座會較為容易相處呢？大家屬於同一個元素的星座因為價值觀相近，會較容易吸引，好動型的火元素白羊座、獅子座同人馬座；踏實型的土元素金牛座、處女座同山羊座；思考型的風元素雙子座、天秤座同水瓶座；感性型的水元素巨蟹座、天蠍座同雙魚座，凡係同元素的人就會較投緣，大家諗法接近，夾起來快好多但同樣因為大家太似，就唔能夠互補不足！
而元素同元素之間又有妙微的關連，火同風特別夾；土元素同水元素又夾d！除元素同元素之間具有吸引力之外，相連前後的星座會係其次容易玩埋一齊的組合，例如山羊座同人馬座、水瓶座；處女座同獅子座、天秤座咁！聽落係咪覺得咁多組合咁多條件實有夾同唔夾，真係咩都係你班占星師講晒啦！其實諗深一層夾同唔夾，只要你真係鍾意一個人就算大家又幾唔夾，都可以長相廝守；就算大家有幾夾都好，唔愛就係唔愛，夾同唔夾只係一個藉口！
